台 灣 童 謠
◆搖呀搖
搖呀搖，湊挽茄，
挽偌多，挽一飯篱，
也有當食，也有當賣，
也有當給阮嬰仔做度晬，
嬰仔哭，阿母無閒當上灶，
嬰仔驚，阿母緊拍尻脊骿，
嬰仔哮哇哇，阿母嘴內就唸歌，
嬰仔哭不恬，阿母直直唸，
唸講欲去阿媽兜，
嫷衫給你穿，嫷帽仔給你戴，
明兒哉，挈你去看戲，
嬰仔無愛哭，阿公講乖巧，
胸前給你結紅包，嬰仔笑咪咪，
阿媽提金含，嬰仔就甜甜甜，
嬰你睏坦坦，阿妗給你掛八仙，
嬰仔嘴靦紅絳絳，阿舅給你結銜鈴，
嬰仔一下怳，阿姨給嬰仔戴烏鼎，
嬰仔吃吃笑，阿母沿路行，沿路搖，
乖乖睏，一暝大一寸，
乖乖惜，一暝大一尺。
